黃偉民之癸巳蛇年前因後果(1) ── 立春之後，已經係蛇年
二月十号星期日，就係大年初一嘞，但係，電台電視報嗰啲術數師，話俾我地聽，二月四号星期一，立春，新嘅一年，蛇年，已經開始。
奌解未到年初一，新嘅一年，就已經開始呢？
中國農曆，其實有兩套系統，一套叫太陰曆，跟月亮而排；一套叫太陽曆，跟太陽而排。
初一，初二，初三，到十五就月圓，到初一就月缺。月圓月缺，就係月亮圍繞地球一周，亦即係一個月。依個係太陰曆。
太陽曆講嘅，係廿四節氣。
十二個節，代表十二個月，每個月中間，又有中氣。加埋就廿四節氣嘞。
立春，係新嘅一年開始，即係正月。
驚蟄，係二月；清明，係三月，到立夏，就係四月嘞。
一年四季，立春，立夏，立秋，立冬，根據太陽同地球嘅關係，天氣變化而嚟。佢影響農作物嘅耕作收成，而中國，以農立國，所以，中國嘅術數，都以太陽曆為依歸。
立春，就係新嘅一年開始。亦即係話，二月四号星期一之後出世嘅BB，即使未到年初一，都已經係屬蛇，唔再係龍仔龍女嘞。因為立春之後，已經係蛇年。
由於大年初一前，已經立咗春，民間就將，嚟緊嗰年，即係依個蛇年，叫做盲年，不利婚嫁。
依個蛇年，冇咗立春，民間嘅愚夫愚婦，取其諧音，凡冇立春嘅年份，都不宜結婚。因為"春"都冇咗，又奌生細路呢？
所以，叫盲年，不宜婚嫁。
依個講法，純粹食字，毫無術數依據，所以，唔駛理佢。而且，今時今日，結婚，都唔係為咗生仔啦。
Search